****** LAST UPDATE : 22 - जुलाई - 2018 { रविवार } *****

2018થી ધો.9-11માં CBSE મુજબ NCERTનો સિલેબસ ભણાવાશે

👉🏽NEETમાં વિદ્યાર્થીઓને મુશ્કેલી ન પડે તે માટે શૈક્ષણિક સમિતિનો નિર્ણય


- ગુજરાત માધ્યમિક અને ઉચ્ચત્તર માધ્યમિક શિક્ષણ બોર્ડની શૈક્ષણિક કમિટીની આજે બેઠક મળી હતી. જેમાં આગામી વર્ષથી ધો.૯ અને ૧૧માં અભ્યાસ કરનારા તમામ વિદ્યાર્થીઓની પરીક્ષા સીબીએસઇ પધ્ધતિ પ્રમાણે લેવાનો મહત્વનો નિર્ણય કરાયો છે. જેના કારણે આગામી વર્ષથી ધો.૯ અને ૧૧માં NCERT પેટર્ન પ્રમાણે જ વિદ્યાર્થીઓને અભ્યાસ કરાવવામાં આવશે. સમિતિ દ્વારા આ દરખાસ્તને મંજૂરી આપી દેવામાં આવી છે. આખરી મંજૂરી માટે દરખાસ્ત સરકારને મોકલી આપવામાં આવશે.

મેડિકલ-ડેન્ટલમાં પ્રવેશ માટે નીટ ફરજિયાત કરી દેવામાં આવી છે. નીટમાં પૂછવામાં આવતાં તમામ પ્રશ્નો સેન્ટ્રલ બોર્ડ એટલે કે સીબીએસઈના અભ્યાસક્રમ પ્રમાણે હોય છે. જેના કારણે ગુજરાતના વિદ્યાર્થીઓને ભારે મુશ્કેલી નડતી હોય છે. ચાલુ વર્ષે નીટમાં ગુજરાત બોર્ડના વિદ્યાર્થીઓએ ભારે નુકસાન થયું હતું. આ પરિસ્થિતિ આગામી વર્ષે પણ ઊભી ન થાય તે માટે ધો.૯ અને ૧૧થી જ સેન્ટ્રલ બોર્ડ પ્રમાણે અભ્યાસ દાખલ કરી દેવાનું નક્કી કરાયું છે. હાલમાં પાઇલોટ પ્રોજેક્ટ તરીકે એનસીઇઆરટીના પુસ્તકો ભણાવવાનું કેટલીક શાળાઓમાં શરૂ કરાયું હતું. પરંતુ હવે ધો.૯ અને ૧૧ની તમામ શાળાઓમાં એનસીઇઆરટી પ્રમાણે જ અભ્યાસ કરાવવામાં આવે તેવું નક્કી કરાયું છે.

નોંધનીય છે કે ગુજરાત બોર્ડની સિલેબસમાં વિદ્યાર્થીઓને પ્રશ્નોના વિકલ્પ આપવામાં આવે છે. જયારે સેન્ટ્રલ બોર્ડના સિલેબસમાં થિયરી પર વધારે જોર આપવામાં આવે છે. ગુજરાત બોર્ડના વિદ્યાર્થીઓ હાલમાં વૈકલ્પિક પ્રશ્નો પ્રમાણે પરીક્ષા આપવા ટેવાયેલા છે. પરંતુ હવે નવા સિલેબસ પ્રમાણે વિદ્યાર્થીઓએ નવેસરથી તૈયારી કરવી પડે તેમ છે. શૈક્ષણિક સમિતિમાં આજે આ દરખાસ્તને મંજૂરી આપીને આખરી મંજૂરી માટે સરકારને મોકલી આપવામાં આવશે. આ સિવાય જ્ઞાનકુંજ પ્રોજેક્ટ અંતર્ગત ધો.૯ અને ૧૧ના સિલેબસમાં સરકારી સ્કૂલોમાં ઇ-કન્ટેન્ટ દાખલ કરવાની મંજૂરી પણ આપી દેવામાં આવી છે. એટલે કે આ શાળાઓમાં વિદ્યાર્થીઓ પુસ્તકના બદલે ઇ-કન્ટેન્ટનો ઉપયોગ કરી શકશે. આ સિવાય દિવ્યાંગ વિદ્યાર્થીઓ માટે વિષય પસંદગીમાં પણ છૂટછાટ આપવામાં આવી છે. અંધજન મંડળોમાં વિકલાંગના નિયમોના આધારે શિક્ષકોની ભરતી કરવાનો નિર્ણય પણ કરવામાં આવ્યો છે. સૌથી મહત્વની વાત એ કે હવે નીટ ફરજિયાત થતા ગુજરાત બોર્ડનો મોટાભાગનો સિલેબસ એનસીઇઆરટી પ્રમાણે કરી દેવાની કવયાત શરૂ કરી દેવામાં આવી છે.